Presentación

 A empresa pesqueira do futuro: investimento, innovación e relevo empresarial

Ponse o foco nun dos grandes retos estratéxicos do sector: a transformación do modelo empresarial da pesca. Nun contexto marcado pola descarbonización, a dixitalización, as novas esixencias financeiras e de sustentabilidade, o acceso ao capital e o relevo xeracional convertéronse en factores determinantes para garantir a competitividade e a continuidade das empresas pesqueiras.

O programa estruturarase en dúas mesas redondas:

Mesa 1. Investimento e competitividade: quen financiará a pesca do futuro?

Analizarase como as empresas pesqueiras poderán acceder ao investimento e ao financiamento nun contorno de crecente esixencia en materia de sustentabilidade, gobernanza e innovación. Abordaranse cuestións como o acceso ao financiamento sustentable, a dispoñibilidade de crédito, a concentración empresarial, a dimensión óptima das empresas, a gobernanza corporativa e o papel que poden desempeñar os novos instrumentos societarios e rexistrais.

Mesa 2. Novos modelos de empresa e xestión do talento.

O relevo empresarial e a adaptación das organizacións aos novos perfís profesionais. Quen dirixirá as empresas pesqueiras en 2035, como atraer e reter talento cualificado, que formación demandará o sector e como evolucionarán as estruturas de propiedade e xestión das empresas.

Reuniranse representantes das administracións, entidades financeiras, persoas expertas e organizacións do sector para xerar un debate aberto sobre os principais desafíos aos que se enfronta a empresa pesqueira.

Con esta nova edición, ARVI reafirma o seu compromiso coa sustentabilidade, a innovación e a continuidade do sector, consolidando a Conferencia Internacional ARVI como un foro de referencia para anticipar os cambios que marcarán o futuro da pesca.